Virgen de la Esperanzaren Hezkuntza Bereziko Ikastetxeko (Cheste) emakume eta gazteen taldea joan den ikasturtean sortu zen, eta aniztasun funtzionala duten ikasleek (adina: 14-21), irakasleek, aisia-jantokiko begirale batek eta ikastetxeko ama batek osatzen dute; guztira, 20-25 pertsona inguruk. Hamabost egunean behin biltzen gara Tertulia Feminista Dialogikoak (TFD) eta Bideo-forum Dialogikoak egiteko. Indarkeriarik gabeko espazioa da, konfiantzan oinarritua, eta gaur egungo emakume eta gazteei interesatzen zaizkigun gaiak landu ahal izateko eta partekatzeko gunea ere bada, hala nola genero-indarkeria, harreman pertsonalak, sexu-askatasuna, etab.
Nahiz eta TFD horietan estatus profesional anitzeko pertsonek parte hartzen dugun, adibidez, ikastetxeko zuzendariak eta dibertsitate funtzionala duten ikasleek, berdintasunezko elkarrizketa eta parte-hartzaile bakoitzaren iritzi eta argudioekiko errespetua presente daude une oro, bakoitzak ikastetxean duen kargua alde batera utzita. Espazio horretan inork ez dio inori bizi-leziorik ematen, eta helduenek eta trebatuenek ere ez diete azalpenik ematen gazteenei eta dibertsitate funtzionala dutenei; aitzitik, elkarrekin ikasten dugu, denon artean gai garrantzitsuei buruz eztabaidatzen dugu eta hitz egiten dugu.
Aniztasun funtzionala duten emakume eta gazteak ez dira beti mugimendu feministaren zatitzat hartu, baina mugimendu feminista dialogikoaren planteamenduei esker, non pertsona guztiok dugun lekua, haien ahotsak entzun ditzakegu. Ikastetxeko zuzendariak dioen bezala, “Niretzat, Lidia Puigverten liburuko `beste emakumeak dira´, inoiz kontuan hartu ez direnak”.
Amatasuna edo harreman osasuntsuak izan ziren landu genituen gaiak “One Love. Educación sexual para liderar el cambio hacia unas relaciones plenas” artikulua partekatu genuenean. Tertulietan El Diario Feministako artikuluak erabil daitezke, nazioarteko komunitate zientifikoak bermatutako ikerketetan oinarritzen direlako beti, eta hizkera ulergarria, egunerokoa eta gertukoa erabiltzen dutelako.
Emakume- eta gazte-taldeak TFD horietan egiten dituen hausnarketen eta elkarrizketen maila ulertze aldera, hemen gogoeten eta elkarrizketen lagin bat dago, oso sakonetik eginak, artikulu hori partekatu genuenean: “Leialtasuna beste pertsona errespetatzea da; gaizki tratatzea edo engainatzea, aldiz, harreman toxikoa da”. “Zure bikotekideak ez zaitu behartu behar egin nahi ez duzun zerbait egitera, emakumeak libreak gara. Bestela, ez da harreman ona “.
Beste artikulu batekin (“Emakumeen elkartasuna genero-indarkeria prebenitzeko”) honakoak izan ziren ekarpenak: “batzuetan arrazoirik gabe kritikatzen dituzte emakumeak”. “Solidaritatea da tertulietako hitz gakoa, emakumeok elkarri laguntzea”. “Ahizpatasunak esan nahi du denok berdinak garela, denok garela emakumeak”. “Norbait maite baduzu eta ez baduzu babesten, norberekoikeria da. Harreman batean konfiantza, ardura eta zintzotasuna daude”.
Hipatia de Alejandría liburuarekin: “Gizonak eta emakumeak ados egon behar dira ondo tratatzeko”. Ausarta izateak esan nahi du oinak lurrean izatea eta honako hau esatea: honaino iritsi da, tipo txarra zara”. “Inork ez du zertan kontrolatu birjina naizen ala ez, nik nahi dudan pertsonak jakingo du.”
Profesionalok konturatu ginenean, hunkitu egin gintuen haiek, berez, barruan dutena adierazteko libre eta seguru sentitzen direla esateak. Gure ustez, oso garrantzitsua da haien ahotsak entzutea eta mugimendu feministaren barruan aintzat hartzea. Eta asko gustatzen zaigu haien nahiak, kezkak eta iritziak entzutea. Hunkitu egiten gara emakume izateagatik gauza asko partekatzen ditugula konturatzean, eta, batez ere, elkarrengandik zenbat ikasten dugun jakitean. Taldean sartu den amak ere berretsi dizkigu iritzi horiek guztiak.
Aurten, ikastetxean beste talde bat hasi da, gizon eta mutilen talde bat. Haiek ere nesken asmo berarekin elkartzen dira, feminismoa gizon eta emakumeen gauza delako. Horrelako espazioekin gure gizartea hobetzen ari da, ahotsa eta hausnarketarako aukera ematen baitzaie halakorik ez zuten pertsonei, une desberdinak partekatuz, helburu berarekin: elkartasuna eta demokrazia bezalako balioetan heztea eta pertsona kritikoak izatea.
Egilea: Eva Rubio
