Erantzukizunak agintzen du, eta aurten ere ezin izan da kdk saria ospatu ikasturtearen amaieran, aurreko urteetan bezala, Deustuko Unibertsitateko auditoriumean, haur, gazte eta ijito familiekin, irakasleek eta erakundeetako ordezkariek lagunduta. Oraingo honetan, 2021-22 ikasturteko lehen hiruhilekoaren amaieran, aurreko ikasturteko derrigorrezko bigarren hezkuntzaren eta derrigorrezkoaren ondokoaren sariak banatu ziren.
Forma aldatu bazen ere, sariaren helburu orokorrak, antolatzaileek adierazi zuten bezala, berberak dira:
- Ijito herriarentzat harrotasuna da adinekoek, kasu gehienetan, izan ez zuten aukera aprobetxatu izana.
- Jendaurrean aitortzea ikasle horien eskolaldi osoan zehar irakasleek eta familiek egindako lana.
- Ikasten jarraitzera eta balio dutena erakustera animatzea.
Ez ziren aldatu ikasleek sariak jasotzean erakusten duten emozioa eta ikaskideekin partekatzen dituzten mezu positiboak, ez eta erakundeetako ordezkarien eta antolatzaileen aintzatespen- eta animo-mezuak ere.
Bai Isabel Ariceta Deustuko Unibertsitateko Hezkuntza eta Kirol Fakultateko dekanoak, bai Juan Ibarretxe Bilboko Udaleko Gizarte Gaietako zinegotziak, bai Iñaki Orbe Eusko Jaurlaritzako Hezkuntza Saileko Bizkaiko lurralde-ordezkariak bizialdi osoko hezkuntzak duen garrantzia azpimarratu zuten, bai eta hezkuntzaren beharra ere, kulturen arteko bizikidetzari lehentasuna emango dion gizarte justuagoa eraikitzeko.
Bestalde, Kale Dor Kayikoko Oscar Vizarragak nabarmendu zuen «hezkuntza dela gure herria kulturarteko gizarte batera eraman ahal izateko bilatzen dugun askatasun irrikatua lortzeko aukera bakarra». Sarituek familiaren babesak eta norberak nahi duenaren aldeko borrokak duten garrantzia azpimarratu zuten. Jasone Frantsesak, Ekoizpen Grafikoaren Diseinu eta Kudeaketako Goi Mailako graduatuak, bere ikasketen hautaketan huts egitearen beldurra partekatu zuen, baina argi utzi zuen: «Hobe da urtebete galtzea nahi ez duzun zerbaitetan lan egitea baino. Norbaitek zerbait ezinezkoa dela esaten dizunean, gogoratu bere mugez ari dela, eta ez zureez».
Rocio Jimenezek, Erika Jimenezek eta Arturo Amayak, erdi-mailako hiru graduatuk, beren burua gainditzearen garrantzia azpimarratu zuten, baita beren seme-alabentzat eredu izatearena ere: «nahi izanez gero posible da», «ikasteko ez dago adinik, ez oztoporik ez kulturarik».
José Manuel Lópezek, Zerga eta Aholkularitza Fiskalean masterra duenak, hitzaldiak itxi zituen, eta lehengusu eta lehengusinak animatu zituen aurrera jarrai dezaten, bidea gogorra izan arren, sariak merezi duelako. Osaba-izebei nabarmendu zienez, oso garrantzitsua da beren ingurune hurbila trebatzera animatzea, haiei laguntzea, eta ahaleginaren, dedikazioaren eta sakrifizioaren balioak irakastea, biharko egunean neska-mutil horiek izan daitezen hemen egongo direnak, beren esperientziak partekatuz eta etorkizuneko belaunaldientzat eredu izanik.
Ekitaldiari amaiera emateko, Tío Manuelek eskerrak eman zizkien erakundeei eta bertaratutako irakasleei, eta, horrez gain, oso harro agertu zen saridun guztiez, oso positiboki baloratu zituen haien hitzaldiak, eta ikasten jarraitzera eta ametsengatik borrokatzera animatu zituen. Familientzat ere hitz politak izan zituen, eta seme-alabei ikasketetan babesa ematen jarraitzeko eskatu zien, hor baitago haien etorkizuna eta ijito herriarena.
Egilea: Luisa Maria Puertas
