Imajina dezakezue indarkeriarik gabeko gizarte bat? Bakean ikasi eta elkarrekin bizitzeko eskolak, jazarpenik jasateko beldurrik gabe? Utopia da, baina zenbat eta gehiago ezagutu eta aplikatu jazarpenaren aurka funtzionatzen duena, orduan eta gehiago hurbilduko gara utopia horretara.
Jazarpena, erasotzaile baten eta biktimaren arteko botere-desberdintasunaren ondorioz, behin eta berriz gertatzen den jokabide oldarkor gisa definitzen dugu. Azken hamarkadetan, jazarpena osasun publikoko arazo larri bihurtzen ari da, eta horrek ondorio fisiko eta mental larriak dakartza. Hori dela eta, familiak eta eskola aktiboki inplikatu dira, eskola‑indarkeria prebenitzeko eta desagerrarazteko.
Denbora askoan zehar, jazarpenaren aurkako hainbat programa ezarri dira hainbat eskolatan; hala ere, programa horiek guztiek ez dute eraginkortasun eta arrakasta bera izan, eta, beraz, azken urteotan ikerketak egin dira eskola‑jazarpenari eta cyberbullying-ari buruz. Ikerlariaren eta kideen kasuan, beste ikerketa askoren analisia egin zuten, prebenitzeko eta geldiarazteko faktore nabarmenenak eta eraginkorrenak identifikatzeko.
Ikerketa horrek ondorioztatu zuen eskola-jazarpena murrizten laguntzen duten faktore arrakastatsuen artean irakasleen, gurasoen eta ikasleen ekintza dagoela; esku-hartze horien artean, eraginkorrenak guraso eta irakasleentzako informazioa, ikaskideen esku-hartzea (bystanderren) eta irakasleen prestakuntza dira.
Ikasleen parte-hartze informala sustatzen duten jarduerak, hala nola ikaskideen arteko elkarrekintza naturala sustatzen duten jarduerak edo eztabaidak, eraginkortasun orokor handiagoarekin lotu ziren. Horiekin lortzen da biktimarengan edo jazartzailearengan ikusmira jarri barik, jazarpen‑kasuei buruz hitz egitea, kontzientzia morala garatzea, eta biolentziaren kontrako jarrera lantzea eta pertsona guztiak inplikatzea jazarpenaren aurreko erantzunetan.
Era berean, irakasleen eta gurasoen prestakuntzaren bidez, komunitate osoaren interbentzioa lortzen da, eta, horren ondorioz, eskola-jazarpenak beherakada izan zuen.
Beraz, ezinbestekoa da eragile guztien lankidetza eta parte-hartze aktiboa, bai eta jazarpenaren aurkako borrokan eraginkorrak direla frogatu duten neurriak eta programak erabiltzea ere, eskolan indarkeria prebenitzen eta desagerrarazten arrakasta lortzeko. Komunitate osoa inplikatzeko modu bat, eraginkortasuna frogatu duena eta faktore horiek guztiak biltzen dituena, gatazkak prebenitzeko eredu dialogikoa da, baita 0 indarkeria Ausarten Kluba eta solasaldi dialogikoak ere.
Egilea: Ainhoa Bilbao
