Musikaren indarra eta horrek gizartean dituen ondorio positiboak hainbat ikerketatan aztertu dira. Musika ez da soilik musikari edota musika ikasketak dituzten pertsonen artean aztertu; bai eta sozialki eta kulturalki anitzak diren komunitateetan ere. Adibidez, Jane Addams-en Hull House ekimenean, Chicago-ko industria ingurune batean, musika tresna garrantzitsua izan zen gizarte inklusioa lortzeko. Hala ere, gizarte lanaren diziplinaren helburuak—gizarte aldaketa, gizarte kohesioa eta pertsonen boteretzea—musikaren erabilerarekin erlazionatutako ikerketak oraindik ez dira nahiko aztertu. Beraz, “Literature Review on Music, Social Work and Respect for Diversity” artikulu zientifikoak musikak nola lagundu dezakeen aztertzen du, gizarte lanaren helburuak lortzeko.
Horretarako, Web of Science datu-basean bilaketa egin zen. 199 artikuluren laburpenak aztertu ziren, eta 62 artikulu aukeratu ziren, ea ikerketaren galderak erantzuten zituzten aztertzeko. Azkenik, 28 artikulu aukeratu ziren, eta horien artean lau eremu sozialetan musika ikertu zen: gizarte aldaketa, gizarte kohesioa, boteretzea eta askapena, eta gizarte justizia eta dibertsitatearekiko errespetua.
Ikerketa honen emaitzek erakutsi dute 28 artikuluk gizarte aldaketa, kohesioa, boteretzea eta askapena, eta dibertsitatearekiko errespetua lantzen dituztela musika bidez. Adibide gisa, Kirschner eta Tomasellok ikerketa batean aurkitu zuten musika elkarrekin egiterakoan 4 urteko haurrek jarrera prosozial, kooperatibo eta lagungarriagoak aurkezten zituztela. Beste adibide bat musika-egitearen eraginei buruz Pearce eta lankideen ikerketak ematen du, zeinaren arabera abesteak taldearen lotura azkarrago sustatzen zuen beste jarduera batzuekin alderatuta helduengan. Haien ikerketak erakutsi du pertsonak elkarrekin abestean hurbilago sentitzen direla, nahiz eta aurretik elkar ezagutzen ez duten.
Emaitzek erakusten dute musika garrantzitsua izan daitekeela gizarte lanaren helburuak lortzeko, hala nola gizarte aldaketa, gizarte kohesioa, pertsonen boteretzea eta dibertsitatearekiko errespetua. Musika erabilera ezberdinek, hala nola musika hezkuntza, musika produkzioa edo musika entzutea, helburu hauek lortzen laguntzen dutela ikusi da.
Egilea: Ane López de Aguileta
